متحدہ عرب امارات کی قطر کے خلاف سلامتی کونسل میں شکایت

 متحدہ عرب امارات نے اقوام متحدہ کی سلامتی کونسل میں قطر کے خلاف سرکاری طور پر شکایت دائر کی ہے۔ شکایت میں کہا گیا ہے کہ قطر نے شہری ہوابازی کے امن اور سلامتی کو خطرے میں ڈال دیا ہے۔امارات کی جانب سے سلامتی کونسل کے سربراہ اور رکن ممالک کو ارسال کیے گئے تحریری خط کی ایک کاپی العربیہ کو بھی موصول ہوئی ہے۔ خط میں بتایا گیا ہے کہ رواں سال 15 جنوری اور 26 مارچ کو قطر نے اْس وقت شہریوں کی زندگیوں کو شدید خطرے سے دوچار کر دیا تھا جب قطر کے لڑاکا طیارے خطرناک طریقے سے مسافر طیاروں کے نزدیک آ گئے جب کہ یہ طیارے بین الاقوامی طور پر طے شدہ رْوٹس پر رواں دواں تھے۔خط میں مزید کہا گیا ہے کہ یہ امر انتہائی افسوس ناک ہے کہ قطر کی جانب سے غیر ذمے دارانہ کارروائیوں کا سلسلہ جاری ہے جس سے اماراتی پرچم کے حامل مسافر طیاروں کی سلامتی کو شدید خطرہ لاحق ہے۔متحدہ عرب امارات اس سے قبل شہری ہوابازی کی بین الاقوامی تنظیم “ایکاؤ” کو سرکاری طور پر ایک تفصیلی شکایت پیش کر چکا ہے جس میں قطری فضائیہ کی جانب سے چار مرتبہ اماراتی طیاروں کے راستے میں آنے کی کوشش پر احتجاج کیا گیا تھا۔

About Sub Editor